கரூர் மாவட்டம் தோகைமலை அருகே உள்ள கழுகூர் ஊராட்சிக்குட்பட்ட ஏ.உடையார்பட்டியை சேர்ந்த ரவி மகள் சந்தியா(13), துரைசாமி மகள் வனிதா(13), மூர்த்தி மகள் சரோஜினிதேவி (13), மாணிக்கம் மகள் பாண்டிமீனா (13. இவர்கள் 4 பேரும் கழுகூர் அரசு உயர்நிலைப்பள்ளியில் 8–ம் வகுப்பு படித்து வந்தனர்.

இந்த மாணவிகள் 4 பேருடன் அதே பள்ளியில் படிக்கும் மேலும் 4 சிறுமிகள் மற்றும் ஒரு சிறுவன் உள்பட 9 பேரும் கழுகூரை அடுத்துள்ள மாரிபாறைபட்டியில் மலை மேல் உள்ள உள்ள சுயம்பெருமாள் கோவிலுக்கு சாமி கும்பிட 5 சைக்கிளில் நேற்று மதியம் சென்றுள்ளனர்.

மலைஅடிவாரத்தில் சைக்கிள்களை நிறுத்தி விட்டு மலையில் ஏறிய 9 பேரும் கோவிலில் சாமி கும்பிட்டு விட்டு அங்கேயே அமர்ந்து மதிய உணவை சாப்பிட்டுள்ளனர். பின்னர் கீழே உள்ள சுனையில் தண்ணீர் குடிப்பதற்காக 9 பேரும் கீழே இறங்கி வந்துள்ளனர்.

இவர்களில் சந்தியா, வனிதா, சரோஜினிதேவி, பாண்டிமீனா ஆகிய 4 பேரும் தண்ணீர் குடிக்க முயன்ற போது எதிர்பாராத விதமாக ஒரு சிறுமி மட்டும் தண்ணீரில் தவறி விழுந்துள்ளார்.அருகில் நின்ற மற்ற சிறுமிகள் அவரை காப்பாற்றுவதற்காக கையை பிடித்து இழுத்த போது அவர்களும் தண்ணீரில் விழுந்தனர். தொடர்ந்து 4 சிறுமிகளும் தண்ணீரில் விழுந்து மூழ்கியுள்ளனர்.

இதை பார்த்த மற்ற 5 பேரும் மலைமேல் உள்ள கோவிலுக்கு ஓடி சென்று காப்பாற்றுங்கள், காப்பாற்றுங்கள் என சத்தம் போட்டுள்ளனர். அப்போது அங்கு நின்றவர்கள் மற்றும் அருகில் உள்ள கிராம மக்களும் அங்கு ஓடி வந்தனர். பின்னர் சுனையில் இறங்கி தண்ணீரில் மூழ்கியவர்களை தேடினார்கள். அப்போது 4 சிறுமிகளும் பலியானது தெரிய வந்தது. இதையடுத்து 4 சிறுமிகளின் உடல்களையும் மீட்டு கரைக்கு கொண்டு வந்தனர்.

தகவல் அறிந்ததும் சம்பவ இடத்திற்கு ஓடி வந்த பெற்றோர்கள் மற்றும் உறவினர்கள் பலியான சிறுமிகளின் உடல்களை பார்த்து கதறி அழுதனர். மேலும் அந்த இடத்தில் 3 ஆயிரத்திற்கு மேற்பட்டோர் திரண்டதால் பரபரப்பு நிலவியது. தகவல் அறிந்த கலெக்டர் ஜெயந்தி, எஸ்.பி. ஜோசிநிர்மல்குமார், மாவட்ட வருவாய் அதிகாரி அருணா,பாப்பாசுந்தரம் எம்.எல்.ஏ.,டி.எஸ்.பி.ஜமீம், உள்பட பலர் அந்த பகுதிக்கு விரைந்து வந்து அவர்களுக்கு ஆறுதல் கூறினர்.

இதை தொடர்ந்து குளித்தலை அரசு ஆஸ்பத்திரிக்கு 4 சிறுமிகளின் உடல்களும் கொண்டு செல்லப்பட்டு அங்கு பிரேத பரிசோதனை செய்யப்பட்டு அவர்களது உறவினர்களிடம் ஒப்படைக்கப்பட்டது.இந்த சம்பவத்தால் கிராமமே சோகத்தில் மூழ்கி உள்ளது.